Tilmelding til Elektron Deildina og Undankappingina!

Nú eru vit til reiðar at skráseta lið og leikarar til Elektron Deildina, og samstundis eisini undankappingina! Fyri at hava møguleika fyri at koma beinleiðis í Elektron Deildina brúka vit okkara gamla “3 av 5” reglugerð ið eisini var galdandi fyrru sesong. Nærri kunning viðvíkjandi hesum er seinni í hesi grein.

Vit eru sera spent uppá nýggjastu sesongina av okkara Counter Strike kapping, ið hesaferð eitur Elektron Deildin #5! Deildin er stuðlað av Elektron, Elding, Føroya Bjór og Pizza67! Áleið 56 leikarar fara at leika í deildini har spælt verður um góðar 50.000,- tilsamans. Tað verða top 5 liðini sum fáa sín part av teimum 50.000 krónunum,  og mett verður at vinnandi liðið fær áleið 30.000,-. Júst hvussu vinningarnir verða burturlutaðir í millum liðini verður kunngjørt tá kappingin er byrjað. Tó so, verður hetta kunngjørt áðrenn kappingin er komin í helvt.

Fyri teir flestu spælararnar og liðini krevst tað, at tey spæla seg víðari til Elektron deildina í gjøgnum okkara undankapping. Undankappingin verður spæld yvir eitt átta daga tíðarskeið. Undankappingin byrjar tann 1. Februar og finaludagurin er Fríggjadagin 8. Februar. Kappingin fyrigongur seg fyrst í einum bólkaspæli, har liðini verða deild upp í bólkarnar A, B, C, og D. Spælt verður annan hvønn dag, uttan 3. Februar (um ikki annað er avtalað í millum liðini). Tað er ókeypis fyri øll at luttaka í undankappingini ið kemur í stað fyri eCup kappingina sum skuldi verið fyrr í Januar.

Hósdagin og Fríggjadagin 7-8. Februar verða semi-finalur og finalan í Undankappingini. Tá verður kunngjørt hvørji lið luttaka í Elektron Deildini.

 

Tilmelding kann gerast á leinkjinum niðanfyri.

https://goo.gl/forms/LQ94kzrsNNnyIn5h1

Seinasta freist at melda seg til undankappingina er Mikudagin 30. Januar klokkan 20:00. Meldið tykkum til stundisliga, soleiðis at allir leikarar verða skrásettir rætt. Liðini ið ikki koma víðari til Elektron Deildina fáa høvið at luttakað í Deild B.

 

Bólkur A og C spæla Fríggjakvøldið og Mánakvøldið 1 Februar og 4 Februar.

Bólkur B og D spæla Leygardagin og Týskvøldið 2 Februar og 5 Februar.

 

Manglar nakar dystur, so kunnu teir spælast Sunnudagin 3. Februar ella Mikudagin 6. Februar. Seinasti dystur skal verða leiktur áðrenn Mikukvøldið klokkan 21:30.

Spælt verður frá klokkan 19:00 allar dagar, tó undantikið leygardagin, tá byrjað verður klokkan 17:00. Semi-finalurnar og finalan verður kunngjørt dagin fyri, men tó við ætlaðan byrjanartíðspunkti frá klokkan 19:00.

Fyri at sleppa beinleiðis í Elektron Deildina er neyðugt at 3 av 5 spælarum á liðnum framvegis eru teir somu leikararnir sum luttóku í Elektron Deildini #4. Eisini loyvur regulin, at um 4 av 5 leikarum vóru í einum av top 5 liðunum til síðstu sesong, so fær liðið eisini beinleiðis atgongd til Elektron Deildina. Tað eru bert main-roster leikarir ið telja, og ikki um ein spælari er skrásettur sum útskiftari frá fyrru Sesong ella sum útskiftari í Sesong 5.

Stroyming

Vit royna at stroyma alla undankappingina. Annars verður finalan stroymað á eSport.fo/live og á www.twitch.tv/esportfo.

Mannagongd

Liðini fáa tillutað ein servara at spæla á, sí nærri á CS:GO síðuni tá skrásetingin er liðug. Bæði liðini skulu møta stundisliga á servarinum, og spælt verður altíð so skjótt sum gjørligt eftir ein dyst.

Bólkaspæl er Bo1, og miðjað verður eftir at spæla 3 dystir fyrsta dystardag, og 2 dystir næsta dystardag hjá bólkunum.

Á okkara CS:GO síðu ferð at verða eitt leinki til at síggja Brackets og hvørjir dystir skulu spælast.

Bert nummar 1 og 2 fara víðari úr bólkaspælinum víðari í einum single-bracket skipan, sum sær soleiðis út.